ستي والأشعة ..


دائما تحدثني ستي عن وجع مفاصلها .. (عمرها 94 سنة وبتمشي 3كلم ).. أخدتها 3 مرات على دكاترة عظمية ومرة على دكتور عصبية بمصياف ، وبعد صور الاشعة والتحاليل يقول لها الأطباء : ما فيك شي .. ما شاء الله جسمك متل ليرة الذهب الصافي ..
وكانت عندما تسمع عبارة ما فيكِ شي تجن وتعصب وتعبس وتتمتم ، وتقول لهم : ما شاء الله عليكم .. من وين متخرجين .. من أي جامعة ؟! و»هاد الوجع من شو لكن» ؟!
يقولون لها : العمر يا ستي.. وجع المفاصل مرض العمر ..
وعندما نخرج تقول لي : ما بيفهموا .. لو بيفهموا كانوا عطوني دوا .. خامس مرة قلت للدكتور .. إذا قلتَ لها : ما فيك شي بتقول عنك : ما بتفهم .. عطاها الدكتور حبوب فيتامين .. طلعت مبسوطة ، وقالتلي هاد الدكتور فهيم .. بزيارتي الأخيرة عالضيعة رجعت تشكيلي نفس الحالة ..
قالت لي : يمكن دكاترة الشام شاطرين .. خدني عالشام يا إبني ..
وبالشام قلت للدكتور شو بتحكي ستي عالدكاترة لما ما بيعطوها دوا .. المهم بعد صور الأشعة ، كانت النتيجة جيدة ، قال لها الدكتور : عندك وجع ، ولازم تاخدي هذا الدواء .. فنظرتْ إليه بإعجاب ، وقالت : والله أنت أفهم دكتور بروح لعنده ..
قلت بدي اعمل معها «منيحة» مع ستي وفسّحها بالشام قبل ما ترجع عالضيعة .. اخذتها على بلودان وبالمطعم طلبنا غدا ..
هي أكلتْ لقمة شرائح سمك فيليه .. وعبست عبسة .. يا لطيف إلطف ، ونظرت إليّ بغضب وقالت لي : جايبني لآخر الدنيا حتى تطعميني جبنة ؟! ويا ريت جبنة طيبة ، والله جنس الدسم ما فيها ..
المهم ، بالنزلة عالشام ، وكانت الدنيا ليل ، وعالحاجز العسكري بالديماس طلب مني العسكري نمرر السيارة لتصويرها عالسكنر ..
قلت لها : انزلي ستي لأن في بالجهاز أشعة ..
الله علقني وغلطت بهالكلمة ..
قالتلي : خليهم يعملولي صورة اشعة !!
يا ستي .. يطولك يقصرك .. ما في فائدة !
ما صدّقت انهم ما بيصوروا متل المشفى..
المهم رجعت ستي زعلانة .. وبالضيعة فضحتني ليش ما صورتها اشعة عحاجز الديماس ..

هلال عون
التاريخ: الخميس 13-6-2019
رقم العدد : 16999